Amakuru

Umuvugizi wungirije wa ADEPR ntakibarizwa mu gihome

Umuvugizi Wungirije wa ADEPR, Rev. Karangwa John, yarekuwe nyuma y’amezi umunani yari amaze afunze aho yari akurikiranyweho ibijyanye no gukoresha inyandiko mpimbano.

Rev. Karangwa yatawe muri yombi mu Ukwakira 2019. Yashinjwaga icyaha cyo gukoresha inyandiko mpimbano, igihe yiyamamarizaga umwanya w’Umuvugizi wungirije muri ADEPR, kuko byasabaga ko uwiyamamariza uwo mwanya agomba kuba afite Impamyabumenyi yo ku rwego rwa (Bachelor’s).

Icyo gihe yatanze impamyabumenyi yo muri Philippines n’iyo muri Uganda, biza kumenyekana ko ari impimbano atigeze ahiga.

Mu iburanisha riheruka ryo ku wa 10 Kamena 2020, Ubushinjacyaha bwari bwasabye Urukiko rwisumbuye rwa Nyarugenge, rwaburanishije urubanza rwe, gufungwa imyaka irindwi no gutanga ihazabu ya miliyoni 5 Frw, kubera icyaha cyo gukoresha inyandiko mpimbano.

Ku mugoroba wo ku wa 30 Kamena 2020 nibwo Urukiko rwisumbuye rwa Nyarugenge rwatanze umwanzuro wa nyuma kuri urwo rubanza, rwemeza ko Rev Karangwa ari umwere.

Ugira uti “rwemeje kwakira ikirego cy’Ubushinjacyaha kuko cyaje mu nzira no mu buryo bukurikije amategeko ariko rusanga nta shingiro gifite. Rwemeje ko Ubushinjacyaha budakwiye kongererwa igihe cyo gukora irindi perereza kuko urubanza rumaze amezi arenga atandatu mu rukiko.’’

“Rwemeje ko nta bimenyetso simusiga bihamya Karangwa John icyaha cyo gukora no gukoresha inyandiko mpimbano. Rukijije ko Karangwa John atsinze.’’

Rev. Karangwa John wari ufungiye i Mageragere, yafunguwe ndetse inkuru yo kurekurwa kwe yakiriwe neza n’abo mu muryango we.

Amakuru IGIHE yamenye ni uko ADEPR yari itarasimbuza Rev Karangwa John ku mwanya we cyangwa ngo ashyirwe inyuma y’itorero [gutengwa] nubwo bivugwa ko iyo gahunda yari ihari.

Rev. Karangwa yatorewe kuba Umuvugizi wungirije wa ADEPR Ushinzwe Ubuzima bw’Itorero ku wa 20 Gicurasi 2017. Ni umwanya yagezeho nyuma y’igihe yari amaze ayobora Ishami rya ADEPR muri Uganda.

Source:Igihe.com

Share:

Leave a reply

Your email address will not be published. Required fields are marked *