Nyuma yo kwandika indirimbo zihimbaza Imana zirenga 100 yatangiye kuzishyira hanze

Dr. Habyarimana Deogratias, umwarimu muri Kaminuza y’u Rwanda no mu zindi zo Mu Rwanda no mu mahanga, yinjiye mu muziki nyuma y’igihe kinini yari amaze atanga amasomo ajyanye na muzika ari mu mujyo wa Kiliziya Gatolika.

Habyarimana Deogratias wavutse ku wa 01 Mutarama 1974, yavuze ko yahimbye iyi ndirimbo yise ‘Mana Tabara’ biturutse ku bihe bibi bya Coronavirus isi irimo, byaragize ingaruka ku Rwanda, imirimo ya bamwe igahagarara.

Ati “Muri iki gihe isi yugarijwe n’icyorezo cya COVID-19, cyateje imfu nyinshi, ibintu bikangirika, mbese ubuzima bugahagarara mu nzego zose, isi ikeneye gutabarwa. Nta wundi watabara abatuye Isi icyo cyorezo n’ingaruka za cyo, usibye Uhoraho wenyine.”

Uyu mugabo yize imyaka itandatu mu iseminari nkuru Nyakibanda, asoza amasomo ya kaminuza mu cyiciro cya mbere, icya kabiri n’icya gatatu cya Kaminuza, mu mategeko. Yakoreye Leta n’ibigo byigenga bitandukanye ndetse ubu ni umwarimu muri Kaminuza y’u Rwanda mu bijyanye n’amategeko.

Yatangiye gukora umuziki w’indirimbo zihimbaza Imana kuva yiga mu mashuri abanza, aho yayoboraga korari y’abana yaririmbaga Misa z’abanyeshuri, muri paruwasi ya Nkanka muri Diyosezi ya Cyangugu.

Yakomereje umuziki mu mashuri yisumbuye, aho yayoboraga Korari z’abanyeshuri muri GS St Joseph Nyamasheke.

Nyuma aza gutanga amasomo y’umuziki yiga mu iseminari nkuru ya Kabgayi na Nyakibanda. Yigisha umuziki mu isaminari nto ya St Aloys ya Diyosezi ya Cyangugu no mu makorari atandukanye mu maparuwasi ya Diyosezi ya Cyangugu.

Yabwiye IGIHE ko yatangiye guhimba indirimbo muri ibyo bihe ariko ubu akaba yahisemo gutangira gushyira hanze ibihangano nyuma yo guhimba izirenga 100.

Ati “Nyuma yo kugenda nigisha umuziki nibwo natangiye no guhimba indirimbo zitandukanye. Ubu maze guhimba indirimbo zihimbaza Imana zigera ku 100, hari n’izindi ziri mu bitabo bya Nyakibanda, no ku mpapuro zikoreshwa mu makorari ya Kiliziya Gatolika.”

Intaramirwa Rudakubana Christelle wamufashije muri iyi ndirimbo ye nshya ni umunyeshuri muri Kaminuza y’u Rwanda.

Amajwi ya ‘Mana Tabara’ yakozwe na Emmy Pro, uri mu bagezweho mu gukorera amakorali n’abandi bahanzi batandukanye bo muri Kiliziya Gatolika.