Korali Christus Regnat ikomeje kwinjira mw’isura nshya itandukanye niyo tuyiziho

Nyuma yo gukora indirimbo “Mama Shenge” yakunzwe n’abatari bake, Chorale Christus Regnat yakoze indi ndirimbo yo mu njyana ya Reggae bise “Ca Akabogi”

Mu ntangiriro za 2020 nibwo Chorale Christus Regnat yo muri Kiliziya Gatolika Paruwasi ya Regina Pacis Remera yatangiye umushinga wo gukora indirimbo zikoze mu buryo bugezweho twakwita nko kwinjira mw’isura nshya nk’uko abakunzi babo bakomezaga kubibasaba.

Nyuma y’indirimbo zitandukanye bagiye basohora, ubu bashyize hanze indi nshya bise ‘Ca Akabogi’ iri mu njyana ya Reggae. Ni indirimbo igizwe n’impanuro umubyeyi aha umwana we mu nguni zose z’ubuzima yahimbwe na Bahati Wellars.

Hari aho bavuga bati “Ca akabogi mwana wanjye, Ca akabogi nguhe impamba[…] Cyono Ca akabogi nguhe akabando kazakuminura iyi mpinga, uzabe umuntu ugire ubumuntu, uzabe buntu buhindura abantu.”

“Ikomeza yerekana ko uko ubuzima bugenda buhinduka, umuntu yahinduka mu gihagararo, ubwenge, ububasha n’ubushobozi gusa, naho indangagaciro y’ubuntu, ubumuntu, kwita ku bandi, kubarengera no kubagaragariza urukundo nyarwo yo itagombye guhinduka kuko aribwo buntu bumuntu mu bantu.”

“Ca Akabogi” yahimbwe na Bahati Wellars umwe mu bahimbyi b’abahanga ba Chorale Christus Regnat, Imbanzirizamushinga y’imicurangire itunganywa na Bahati Wellars na Emmy pro mu buryo bw’amajwi ikorwa na Bob Pro ufite inzu itunganya imiziki ya The Sound Studio.

Amashusho yatunganyijwe na Papa Emile naho ikinankuru yakozwe na Bizimana Jérémie. imyambarire ikorwa na N. La Douce.

Mu ntangiro z’uyu mwaka ubwo Christus Regnat yashyize hanze indirimbo zitandukanye zirimo ‘Mama Shenge’ yavugaga ku rukundo basohoye muri Gashyantare ubwo haburaga iminsi ibiri ngo hizihizwe umunsi w’abakundana.

Muri Werurwe mbere gato ya Guma mu rugo bari basohoye indirimbo yitwa “ Kuzwa iteka” naho mu mpera za Mata bashyira hanze indi ndirimbo bise ”Mu maboko yawe” yakorewe mu ngo hifashishijwe telefoni.

Chorale Christus Regnat ni imwe mu zibarizwa muri Kiliziya Gatolika muri Paruwasi yitiriwe Umwamikazi w’Amahoro (Regina Pacis) i Remera muri Arikidiyosezi ya Kigali.