AmakuruHanze y'U Rwanda

Adrien Misigaro yisobanuye kubyo Neg G the general amushinja

Muri Werurwe 2019 Adrien Misigaro yasuye abari kugororerwa mu kigo ngororamuco cya Iwawa, yari ajyanwe no kubabwira ubutumwa bwiza bw’Imana no kubafasha kureka ibiyobyabwenge.

Yatunguwe no gusangayo abahanzi bagenzi be ahita abizeza kubafasha gukora ibihangano byiza kandi byubaka igihugu aho kuba imbata z’imico mibi mu migirire no mu miririmbire.

Bamwe mu bahanzi yahasanze banafite amazina harimo; Fireman, Neg G The General, Young Tone n’abandi bari bakiri bato mu buhanzi.

Iki gihe yemereye abahanzi bari bari kugororerwa Iwawa kubakoreshereza indirimbo zitanga ubutumwa ku rubyiruko ndetse zinubaka igihugu.

Nyuma y’igihe gito afatanyije n’ubuyobozi bw’iki kigo, aba bahanzi babashije gukora indirimbo ebyiri, zifatirwa n’amashusho.

Icyakora kuva icyo gihe kugeza ubu ntabwo zirasohoka. Amakuru ahari ahamya ko zarangije gukorwa ndetse isaha iyo ariyo yose zasohoka.

Neg G the General abinyujije ku rukuta rwe rwa Instagram, yishyuje Adrien Misigaro ibi bihangano amushinja kubitindana nyamara byakabaye byarasohotse.

Ubutumwa yanyujije kuri instagram yiwe
Neg G the general

Yagize ati ”Adrien Misigaro, Nyakubahwa. Ese ibihangano mwe n’itsinda mwari muyoboye mwateye inkunga abahanzi bagororewe Iwawa, byaheze he? Umwaka n’igice urashize. Icyo gikorwa cyiza cyaheze he? Cyangwa ni byabindi byo kwifotoreza ku bababaye?”

Mu kiganiro na IGIHE, Adrien Misigaro akibona ubu butumwa, yavuze ko aribyo koko yabashije kubakoreshereza indirimbo ebyiri.

Ati” Wabaza Producer Bob cyangwa Bob Chris wafashe amashusho, byose byararangiye. Amafaranga yose byari kunsaba narayatanze indirimbo zirahari.”

Misigaro avuga ko indirimbo zimaze igihe zirangiye ariko kuzisohora aribyo byagiye bihura n’ibibazo.

Ati ”Igihe Fireman yavagayo nari nzi ko azagenda akumva uko zikoze yazishima tukazisohora. Icyo gihe murabyibuka ko yahise yongera arafungwa. Usibye we ariko n’umuyobozi twari twakoranye wari ukuriye kiriya kigo ngira ngo ntakiriyo yagize ibibazo.”

Misigaro avuga ko ubwo aheruka mu Rwanda yashakaga kuhava azisohoye ariko nabwo agahura n’ibibazo kuko yatashye shishi itabona kubera Covid-19 yari imufatiye muri Afurika.

Kugeza ubu uyu muhanzi w’indirimbo zo kuramya no guhimbaza Imana, yavuze ko agiye kuvugana n’aba bahanzi bakajya kumva indirimbo bazishima agahita azisohora kuko ibintu byose biteguye kandi byishyuye.

Ati”Uko biri kose ni abahanzi bakuru, ngiye kuvugana nabo babanze bajye kuzumva, nibumva zimeze neza rwose tuzisohore. Buri kimwe kirishyuye kandi uvuganye n’abazikoze bakubwira ko zihari. Rero ubu ngiye kuvugana nabo ku buryo zisohoka bidatinze.”

Adrien Misigaro ni umuhanzi w’indirimbo zo kuramya no guhimbaza Imana umaze kubaka izina mu Rwanda ariko umuziki we awukorera muri Leta Zunze Ubumwe za Amerika.

Aherutse gufungura umuryango “Melody of New Hope” wita ku rubyiruko rwazahajwe n’ibiyobyabwenge, ndetse unakangurira abatarabikoresha kutabyishoramo.

Source:Igihe.com

Share:

Leave a reply

Your email address will not be published. Required fields are marked *